20% de desconto 
Reserva un exemplar
Os envíos comezarán a partir do 11/11/2026

Formei parte dun grupo de amigos —inicialmente once; despois chegamos a ser catorce e, ás veces, non eramos máis ca cinco— que, tres meses despois de rematar os estudos en Belas Artes en Madrid, nos mudamos aos Blancos (Ourense) sen saber moi ben a que. O noso único guía nun concello profundo e afastado era un compañeiro da carreira, natural de Xinzo de Limia, que nos falou dun edificio abandonado que «quizais» nos podían prestar. E prestáronnolo. Alí marchamos: unha mestura de mozos de Burgos, Madrid, Valladolid e Galicia dispostos a vivir xuntos, construír unha comunidade e desenvolver unha proposta artística. Así nacía Espacio Matrioska. Un deles —quen escribe estas liñas— levou tamén a súa cámara e comezou a disparar carretes desde o primeiro día. Pasei alí algo máis de catro anos, ata que a convivencia rematou mal e regresei a Madrid.

Os días que foron. 2014–2018 é un rexistro visual, un diario íntimo daqueles anos nun lugar que custou sentir como fogar, pero que acabou por selo e que deixou unha fonda nostalxia nun madrileño de orixes andaluzas. Este traballo quere poñer en valor as persoas e os momentos vividos ás abas da Raíña Loba e ás portas do Xurés, nunha Limia fría no inverno e abrasada no verán. Unha proposta de reconciliación.

 «[…] O proxecto de Jesús García «Os días que foron 2014–2018» é un traballo que propón de xeito acertado unha narrativa íntima e, ao mesmo tempo, coral; onde se perciben os anceios e ideais da xuventude sen agochar as contradicións e os conflictos dunha vida en comunidade. Afastado dun ollar paternalista, tantas veces común en proxectos que se achegan ao momento vital da descuberta da vida adulta, Os días que foron propón un documentalismo doméstico, interior; unha búsqueda da identidade propia e colectiva ao redor da necesidade e a ledicia esperanzada da construción de alternativas e novos territorios e a certeza das ruínas do tempo e da memoría».