«Por iso, Bet e Ramon consideran que os arquitectos deben saber manterse no difícil equilibrio que, ao longo dos séculos, establecemos entre o que chamamos natureza e o que chamamos cultura. Ou, dito doutro xeito, empregando os termos acuñados hai moito tempo por Friedrich Schiller: os arquitectos deben procurar ser tanto “inxenuos” como “sentimentais”. […] Inxenua e sentimental: dúas boas palabras para seguir describindo a exquisita arquitectura de Bosch Capdeferro».

— Eduardo Prieto

bosch.capdeferro arquitectura

Ramon Bosch e Bet Capdeferro son arquitectos titulados pola Escola Técnica Superior de Arquitectura de Barcelona —UPC BarcelonaTech— nos anos 2000 e 1999, respectivamente. Bet Capdeferro cursou o Máster en Arquitectura da Paisaxe da Fundación Politécnica de Cataluña.

En 2003 fundan o estudio bosch.capdeferro arquitectura na cidade de Girona, desde onde traballan na transformación de espazos de diversas escalas e naturezas, centrando a súa atención na relación entre o ser humano e o medio. A súa actividade profesional no estudio estivo sempre acompañada pola experiencia docente en universidades como a ETSAB-UPC BarcelonaTech, a ETH de Zúric, a EPS da Universidade de Girona, a Cornell University de Nova York e a Washington University de Saint Louis, achegando, desde a teoría e a investigación, un apoio ao desenvolvemento do proceso proxectual e construtivo.

Conciben o proxecto como unha experiencia cóncava e inclusiva, capaz de integrar harmonicamente, a través dun proceso aberto, os diversos feitos e axentes que o configuran.